von Gerhard Fischer
Die Frau Goheimrat will in dann Johr amool ion Urlaub in an klenn Kaff aufn Land vobreng. Domitsa sicho is, dässoros aa werklich gfellt, räästsa zovuo erscht amool hie un guckt sich dort gonaa üm. Mit dann, wossa dou secht, issa aa vuol eivoschtanna un su huochzofriedn widdo ahe`im un frääd sich auf ion Urlaub. Dann felltoro plötzlich ei, dässa vogassn hot, nouch an W C zo frouchn. Do hocktsa sich halt hie un schräbbt an Börchomästo an Brief, wuusa aam nouch dann W C froucht.
Daa gut Maa hot nu übohaupt nex mit dann W C aakünngfang. Do issi zooms nei do Kneip ganga un hot aa in Apothe`iko un in Lehra dann Brief gozeicht. Ouwo sulangsa aa boroutn un übole`icht hamm, sie senn mit iora Godankn nett wäddo kumma, als däss mit dann W C bluos die
Wald-Kapell gome`it sei kaa. Do hot halt do Börchomästo daaro Fraa an Brief müss schreib, wuuro die Sach mit dann W C a weng deutlicho doklärt hot.
Lieba goehrta Fraa.
Des wos sie wiss wolltn, hammo natüolich dou.
Es is mittn in aaro schöina Waldwies, ungfaa a Schtund vo dou aus zo laafn. Do Waach dorthie gett durch an schöina Laabwoold übo an klenn Hüüchl. Wennsa aakumma warnsa bogeistot senn vo dann wundoborn frischn Duft wu dann Platz ümschmeichlt.
Die W C Öffnungszeit is: Dienstich,Freitich un Sunntich, ümmo früh in 9a. Ich würd ouwo routn, a halba Schtund bovuos luos gett dort zo senn, wall dort ümmo a gruoß Godrängl is. Sie brauchn ouwo ke`i Angst zo hamm, denn es senn 100 Sitzplätz un noch merra Schte`iplätz dou. Die Daama sitzn auf do Gallorie un künna die Vuogäng vo untn gonaa booubacht. Do Schall is sehr gut. Bei günstichn Wind senn die Töin bis neis Dorf zo hörn. Am Sunntich gibbs ümmo Orchlbogleitung. Die schönnstn Darbietunga warn prämiot. Fo die, wu gern singa, liechn Gsangbücho dou, domits nett su langweilich wörd wenn’s a weng lengo dauot. Bein Fortgenn wörd üm a kle`ina Schpend gobaatn, domit widdo öllos schöi re`igomacht waa kaa.
Bitte entschuldichnsa mei Neuschtodtorisch.
Ich wollts nochamool in huochdeutsch ouschreib, ouwo do hot mei Alta schö dann Brief zugomacht ghott un fortgschickt.
