70 Jahre SG-Stadtrand. Festrede von Ilona Schramm am Weinfest 2006

Io Siedlo un io Siedlofraan,
ich hous amool probiot
zo schreim, wos uns in 70 Johrna
öllos is passiot.

Es worn amool 12 Neuschtodto,
die hamm a Wounung gsucht,
a haufn Kinno hammsa ghot,
sünst wornsa net botucht.

Do hot do Börchomästo gsocht,
nu baut euch halt a Haus,
a Platzla grichto gschtellt vo mio,
io müsst zuo Schtoudt bluos naus.

Die Manno hamm gleich luosgole’icht,
gogroum, gomauot, gsaacht,
zogor die Kinno musstn half,
senn durch die Ge’ichnd gfaacht.

Un 1936 wors
bei uns im „Brauna Haus“,
als „Kle’i-Gärtner“ sennsa nei,
als “Deutscha Siedlo” raus.

Die Siedlung is dann grösso worn,
hot gschtanna ganz alle’i,
mio worn a Schtück vo Neuschtodt wagg,
des wor ächntlich schöi.

Doch wüo uns des dann schpaato beinah
zum Vohängnis worn,
denn wie die Amis kumma senn,
wormo alle’i dou gschtann.


Die Schtoudt, die hot am Kerchtuom uom
a weissa Fahna ghisst,
doch däss mio aa zu Neuschtodt ghörn,
hamm die Ami net gowisst.

Die wolltn, däss mio unnon Ort
aa ganz fix übogaam,
hamm sich zum Schießn aufgobaut,
a Kind hats gleich draa gsahn.

Des Kind is dann zum Vüuschtand gang
un hottna rausgobleut,
du musst jetz Börchomästo mach
un rett unnora Leut.

Gozittot hot do Leistnosch Fritz,
a wor vor Angst ganz bleich,
doch wie sei Marta kumma is,
do isso gschprunga gleich.

Sie hottna a weis Bettuch gaam
mit brauna Flackn drin,
dann gucktsonna noch amol aa,
jetz machmo fei un schpring.

Dann sennsa zu die Amis hie,
die hammsa scho erwart,
do Fritz, daa hot a Schnapsla gricht,
des Kind a Schokolad.

Jetz konntn mio zofriedn gsei,
die Siedlung wor gorett,
do Fritz un aa des Kind senn he’im
un ganz boruicht neis Bett.


Wennmo bein Leistnosch Fritz scho senn
Will ich gleich wättomach,
un ölla Vüoschtänd euch bonaam
bis zum heitichn Taach.

Denn 46 hot do Fritz
dann gsocht zun Büttnosch Ernst,
vo jetzo aa machst du’s a wenig,
domitta aa wos lernst.

4 Johr donouch, io wards net glääm,
gings widdo a weng flotto,
denn 50 hammos übogaam
an unnon Schneidosch Otto.

Doch 51 wors schö aus,
do kam do Anton Knoch,
daa wor dann aa wos lengo dou,
7 Johr, wengo en Touch.

Dann kam do Reichnbachosch Paul,
do Wickleins Karl gleich drauf,
un 61 ging es Lecht
vom Ino Schelo auf.

Do Ino hots dann 18 Johr,
bis nümmo ging, gomacht,
als Schtellvotraato bis zuo Wahl
wors dann do Sigi Klatt.

Un 79 hammsa dann
in Greinosch Albot ghuolt,
doch wor nouch 14 Johr aa Schluss,
a hot nümmo gowollt.


Mio wolln jetz nümmo “Ouna” sei,
mio wolln nabluos noch “Mit”,
do hammsa 93 dann
gowählt in Gustav Schmidt.

Nouch 3 Johrn hot do Gustav gsocht,
ich hous amool vosucht,
bein nächstn Mol is werklich Schluss,
aa wenndo ölla flucht.

Drüm hammo jetz kenn Vüoschtand mehr,
wallmo kenn konntn gfinn,
a Maa hat sich nümmo gotraut,
jetz is a Vüoschtändin.

Mio hattn viela Nama scho,
öb Gustav, Albot, Ino,
a Ernst un Anton worn dobei
aa Paul un Karl un Otto.

Doch jetzo hammo ganz wos Neus,
des hört sich aa gut a,
Ilona hässt die Vüoschtändin
un is halt jetz a Fraa.

Nu mücht ich noch amool zorück
bis nei die Gründojohr,
ich glääb, io künnt euch aa godenk,
wos des fa Arbot wor.

Kaum worn die erschtn Häusla gschtann,
musstn die Manno fort,
do ging do gruoßa Waltkriech aa,
do gruoßa Völkomord.


Viel Fraan worn dou alle’i dohemm
mit Kinno, Haus un Vieh,
un hamms dann schließlich ölla gschafft,
doch froucht nabluos net „wie“.

Su mancho is dou fortgobliem,
hot Haus un Kind nie gsahn,
un trotzdaam mussts dann wättogieh,
su is amool es Laam.

Vo 1950 aa
hammo dann Kerwa ghott,
do Schneidosch Otto wor do Erscht,
daa wusa eigführt hot.

Aa heitzotouch is Kerwa noch
un Weinfest noch dozu,
drüm rout ich euch, trinkt zu an Bier
a Flaschla Wei dozu.

Drüm hör ich jetz es Laabon auf,
domits euch nümmo schtört,
nu dauots widdo 70 Johr,
bisdo noch merra hört.

Hinweis zum Datenschutz

Wir verwenden nur technisch notwendige Session-Cookies. Diese werden automatisch gelöscht, sobald Sie die Sitzung auf unseren Webseiten beenden und den Browser schließen.

Weitere Informationen finden Sie in unserer Datenschutzerklärung.