Das Bad

In unnoro Kinnozeit hot doch damals salt`n e-is a Bad g´hot, wenn mo zur Miet gowohnt hot. Dou is in do Küch goboud´n worn. Do Vatto hot die oval Zinkboudwanna nei die Eck nabon Uof´n gstellt. Nei´n Schlot is a Houk´n gobleut worn, dou hott´o die Schlauf´n vom Weschsääl neighengt un dann schräg drüüm a poormool um die Kaffeemühl rümgoleiert, die am Rahma von do Tür naagschraubt wor, wu´s naus´n Stübla ganga is. Dou drübo hot´o su a graua Pfardsdeck g´hengt, mit a poor brauna un weißa Strääf`n quar rübo un fertig wor es “Badezimmer”.

Dann hot die Mutto in Uof´n aagoworf´n. Mir ham an schön gußeisona, schwarz´n Hard g´hott, von Robert Mauer in do Ernststrouß, mit aro Röhrn un an Wannla naamadraa fürs warma Wasso. Unt´n vier Be-i, uom a fatz´n Uof´nrohr, fast bis an die Deck. Dar ist ölla poor Woch´n amool mit Uof´nwichs poliert worn un hot goglänzt wie a Spaak-schwart.

Erst ist mit kienig´n Huolz a schöss Feuo neigomacht worn, däss na su golunnot hot. Dann hot die Mutto Brikett draufgolegt. Die hamm´o vom Solzköhlo ümmo goliefert kricht. Es hot net lang godauot, bis es Boudwasso im Topf hääß wor. Sie hott´s nei die Wanna gschütt un gleich widdo an neu´n Topf draufgstellt, auf´n Uof´n.

Zuerst is do Vatto draakumma mit´n Boud´n. Ar hot sich hinto do Deck ausgozuog´n un dann nei die Wanna gokrüpf´lt. Mit Kernsääf´n un aro Börscht hot´o sich ougschrubbt. Im Krieg ham mo bluoß noch su schmieriga Taasääfn (Tonseife) kricht. Doumit is do Draak natürlich net su fix runtoganga. Wenn´o fertig war, iss´o aufgstanna, hot mit´n Kuopf übo die Deck goguckt, wie in an Kaschpolestheato, un hot zur Mutto gsocht: „So, jetzt kümmst du draa!“

Mit an Schöpfo is do „Rahm“ vom Boudwasso a wengla ougschöpft worn. Die Mutto hot dann a neu´s, warm´s Wasso dozugschütt un sich nei die Flut´n gstörzt. Am Schluss senn die Kinno ümmo draa kumma. Dou wor zwar die Wanno ganz schöi vuoll, es Wasso hot ouwo bal nümmo ausgsahn wie Wasso. Wenn mo sich beim Oudrück´ln a weng zu sehr gobück´lt hot un is mit´n Hinton an dan goriffelt´n Gusseisen-Uof´n naakumma, hot mo an Löibo gotan un do Orsch-back´n hot ausgsahn wie a Steak!

Nu ja! An an Sunnamd oumd wor desmool Boudtoug, wall do Vatto am Freitig Nouchmittoug-schicht ghot hot. Do Uof´n wor scho aagoleiert. Die Mutto hot dan Topf mit die Pfardsroulad`n, die wu sa beim Antla käfft hot, auf do Uofnplatt´n naamanaa gorutscht un in zwätt´n Houf´n
Boudwasso draufgstellt. Dann hot sa an do Aarecht mit´n Plattla (gusseisernes Bügeleisen) wättogobüg´lt. Do Vatto wor im „Badezimmo“, plätschot in do Zinkboudwanna un rump´lt sich ou. Es Jüngla hot sich auf´s Plüschkannope-i gepflaazt un hot „Rolf Torring“ gschmöikot un gowart, bis´o draakomma is.
Auf e-imool gett es Lecht aus! Stromausfall! Des iss im Krieg öftos vürkumma. „Dunnokeil!“ socht die Mutto, „des hot mo jetzt grad noch gfahlt! Wart, ich huol a Gorlecht in do Kammo!“

Un läfft ab. Do Vatto me-it: „Ich muss mo noch a wengla hääß Wasso neischütt.“ Ar krabb´lt im Dunk´ln hinto do Deck vür un gett auf´n Uof´n zu. Des hässt, su ganz finsto wor´s ja net. Es Feuo hot a bissola durch die zwää Schlitz im Uofntürla durchgflackot. Ar nimmt an Topf un schütt na nei die Wanna. A poor mool hot´s goplumpst. „Wos wor denn des jetzt?!“ socht´o . In dan Aagnblick kümmt die Mutto von do Kammo widdo rei. „Du werst doch …., du werst doch net öbbo …., du werst doch net öbbo meina Roulad´n dowüscht hamm?“ Ar hot sa dowüscht g´hott! Sie leucht mit´n Gorlecht hie, dou senn sa im Boudwasso rümgschwumma. Ölla drei. Do Vatto hot mit´n Topf nackobitschig donaabo gstanna. Aus wor´s mit´n Sunntigs-ass´n. Die Klöiß worn gstrich´n, die Roulad´n senn dosuff´n. Ich hou mo nouchot noch übolegt, wos paaiert war, wenn do Vatto widdo neigstieg´n war, nei die Wanna, war auf die Roulad´n ausgorutscht un hätt sich an do Kaffeemühl festghalt´n.

Es ganza „Badezimmer“ war eingobollot!!


Manfred Schiele