DIE GARDINASCHTANGA

Do Fritz wor dohemma am Tiisch ghockt un hot sei Zeitung golaasn. Do socht sei Fraa: Gieh amool nei do Schtoudt un huol die Gardinaschtanga, wu ich bschtellt hou! Ouwo pass fei a weng auf, wenndossa auf do Schtrouß trechst, dässda nett die Leut dorammlst, oudo gor an a Auto naschtösst. Sie is fei übo 4 me`ito laag, do mussmo schö a weng a Aachnmouß hou. Do Fritz socht: Füo wie blöid hellsta mich denn? Ich bin doch ke`i kle`ino Jung mehr!

Dann ziehto sich aa, üolt seina Hoor, schträcht seina Schnorrn noch amool schöi glatt un trollt sich aus do Schtumm. Wiero im Gschäft die Schtanga secht, grichto an ganz schönn Schreck, ouwo a socht zu dann Vokäufo: Ach, wie ich gobaut bin, des schaff ich doch leicht, wenn’s wäddo nex is: A nimmt die Schtanga auf sei Schulto un will zo Tüo naus. Im salm Moment blääkt schö e`ino hintonna: Pass fei a weng auf, du häbbstmo doch mein Kuopf runto! Doch do Fritz traut sich nett, sich rümzodrahn, wallo dou widdo erchndwu naarammln würd.

Endlich isso auf do Schtrouß un schtolziot kerzngroud he`imwarts. Nouch 200 me`ito kaamna a jungs Mädla mit an enga Pulli un an Miniruock entge`ichn. Do Fritz lässt die Schtanga vorn a weng nauf un draht sich dobei rümm. Wallsa vorn höio wor, gingsa natüolich hintn runto un bein Rümmdrahn wolltossa dann widdo groud trouch, ouwo in dann Moment hot schö a Weiboleut gschrien. Durchdam die Schtanga hintn untnwor, ging es End bei daaro Fraa unton Ruock un wierosa groud wollt recht, is es Röckla huochganga.

Dann gings Schloug auf Schloug. Durch dann Ruck is dann vorna nougang un bei dann Minimädla aufn Hinton drauf. Wie vom Blitz gotroffn, worsa plötzlich dortgschtann, dann drahtsa sich rümm un eh do Fritz denk konnt, hottsa ausghuolt un dann arma Kall e`ina aufn Backn gsullt, dässo sich widdo godraht hot. Do kam a Polizist übo die Schtrouß un wollt sich eimisch, ouwo a konnt daaro Schtanga aa nett ausgoweich. Es hottna am Hintokuopf gotroffn, dässo nouch vorna gschnellst is un nei die Arm vo aaro feina Daama. Die 2 senn dann zosamm naabo do Schtrouß im Groum goland. Des Weiboleut untn un do Polizist auforo drauf. Die Daama hot sich als Erschta widdo gfasst. Wiesa gomerkt hot, däss a haufn Leut dortgschtanna un goguckt hamm, hottsa gsocht: Aber Herr Polizist, warum denn so stürmisch?

Do Fritz hot sich grad widdo gfanga, a wor bluos noch a weng schief gschtanna un doudurch hot die Schtanga a bissola nei do Schtrouß goraacht. In dann Aachnblick is a Lastauto kumma un hot unnon Fritz die Schtanga vo do Schulto gorissn. Dann issa zwischn Maschinawouchn un Hängo unto die Reddo kumma. Nouch ziemlich lango Zeit is unno Fritz dann mit aaro 5-täälichn Schtanga dohemma bei seino Fraa, wie a kle`ino Jung aagotanzt.

Bläbbt bluos noch zo souchn, däss unno Fritz, trotz aaro Schtrouf, noch glimpflich dovaakumma is.
Gerhard Fischer
(Gefi)