KNIPPSO

Es wor su ümma 1950 rüm, do hot die Regiorung in Bayon a Gsetz rausgobracht, wu ölla Ehepoor, die 5 Johr voheiorat senn, a Kind hou müssn. Sie hamm Angst ghott, däss die Bayon sünst su langsam ausschterm. Im Fall, dässes hie un dou amool aus erchnd an Grund nett klapp sollt, kümmt nouch die 5 Johr a Maa vo do Regiorung, daa wu die Aufgab hot, öllos Nüoticha zo tunn, wos a Fraa zuo Mutto macht.
Su wors aa sallmols bei an Poor in Neuschtodt. Sie worn 5 Johr voheiorat un ümmonoch alle`i. Su hamm halt aa die 2, wuol oudo übl, auf dann bsondon Kall gowart. Früh üm 8a gett do Maa ganz goknickt zu seino Fraa un socht: Also mei Guta, ich gieh jetz zun Dienst, ich namm aa, äss daa Maa vo do Regiorung gleich kümmt. Un ab isso!

Sei Fraa setzt sich vuon Schpiechl un macht sich a wengla schöi. Dann klinglts aa schö. Es is ouwo nett daa Maa vo do Regiorung, sondon a Babifotograf. Daa wollt vo do Nachbora ion Kind a poor Bildo mach un hot sich in do Hausnummo goerrt. Die Fraa macht auf un socht ganz leis; Gutn Morchn!
Gutn Morchn lieba Fraa! Ich wäss nett öb Sie wissen worüm ich dou-------
Doch doch, ich wäss bschääd.
Nu gut, do künnomo ja gleich luosgole`ich.
Sicho, bluos wissnsa, ich bin mit daaro Oort wiesa aafang wolln, nett ganz votraut. Wumit gettsn luos?
Nu ich dacht, zunächst a poor Mool aufn Bauch, dann e`i oudo zwäämol aufn Fußbuodn un zum Schluss amend noch in do Boudwanna.
Fußbuodn, Boudwanna, souchnsa? Des hört sich ja öllos su raffiniot aa.
Guta Fraa, souchnsa des nett, grada in do Zwangsluosichkeit licht ja do Reiz vo dann Ganzn un sahnsa, nett amool do Besta vo uns kaa garantio, dässes je`idsmool wos wörd. Ouwo vo 6 Vosuchna klappts bschtimmt amool.
Ja, sicho, ouwo wissnsa, ich wäss nett------
Guta Fraa, mio brauchn uns ja nett su zo schickn.
A Maa vo mein Fach kaa eh nex Guuts goleist, wenno ümmo su zuramml soll.
Ich kaanona ja amool a poor Musto vo meino Leistung gozeich!
Ich voschtieh nett--------
Aa zeichtoro a Babibild un socht:
Gucknsa haa, guta Fraa, is des Kind nett werklich lieb?
Ich hou 4 Schtundn dozu gobraucht.
Sie schluckt a poomool. 4 Schtundn? Du liebo Himml, is des nett a weng zu lang?
Des ja, ouwo es is aa a Mästoschtück worn. Oudo gucknsa sich des dou aa. Öbsos glääm oudo nett, des is auf an Autodach gomacht worn. Do hot zogor do Maa mit müss halt, däss nex passiot.
Ja gibbs denn des aa?
Salbstvoschtandlich, guta Fraa. Wenn a Maa vo mein Fach die Sach boherrscht, do kaaros in ölln müüchlichn Schtellunga gomach. Oudo des dou:
A zeicht a annosch Bild:
Des hou ich am halln Nouchmittouch auf do Coborcho Brück gomacht.
Üm Gotts Willn! Die is doch sehr bolabbt!
Un öb, ouwo des wor a ganz bsondoro Fall. Die Mutto vo dann Kind hot godacht, sie kaa Schauschpielorin gowaa un wollt doumit a weng bokannt waa. Sie künna sich drauf voloss, sie is bokannt worn. Ouwo es Schwierichsta, wos ich je in meino Praxis gomacht hou, wor des dou.
Aa zeicht a Bild mit Zwilling.
Oh Zwilling!
Socht die Fraa.
Ja Zwilling, guta Fraa, unzwoa die Schönnstn, wusa je gsahn hamm. Ich housa an an Nouchmittouch mittn im Winto uom zwischn Kerch un Markt, dort bein Kriechodenkmal gschaffn. Es hot su richtich schöi gschneit un ich hou 3 Schtundn dozu gobraucht. Es wor a racht schwioricha Arbot. Un am schlimmstn worn die haufn Zuschauo, die hamm mich ganz nervöis gomacht.
Sie hamm 4 bis 5 Reiha hintorananno gschtanna, bluos üm an Blick zo dohaschn.
Die Fraa hot bluos noch gschtöint:
Zuschauo, 4 bis 5 Reiha, ooohhh----
Wies ümmo schwioricho worn is, musstmo zogor die Polizei half, äächntlich wollt ich noch 1 oudo 2 mol merra knipps, ouwo die Ächhörnla hattn schö aagfanga,
an mein Apporat rümzoknappon. Ouwo gonuch jetz!
Künnomo jetz aagfang?
Do kaa ich ja jetz mei Schtativ rausghuol.
Jetz fellt die Fraa in Ounmacht.
Gerhard Fischer
(Gefi)